“Ki sa ki Anvlòp ?” Anvlòp se yon inisyativ dijital ki fèt pou modènize youn nan pi gwo tradisyon solidarite nan sosyete ayisyèn nan : “anvlòp la”. Nan lekòl, nan legliz, nan gwoup jèn ak nan kominote, chak fwa gen yon pwojè, yon aktivite, oswa yon bezwen ijan, moun yo konn fè yon apèl ak fanmi yo, zanmi yo, oswa vwazen yo pou yo ede. Sa se yon bèl pratik, men li souvan konn limite paske li fèt ak papye, san transparans, epi li difisil pou rasanble moun ki lwen. Nou pote yon chanjman. Anvlòp se premye platfòm dijital ayisyen ki pèmèt tout moun – lakay ak nan dyaspora – kontribye fasil, rapid, ak an sekirite nan pwojè sosyal, edikatif, kiltirèl ak kominotè. Se yon zouti ki chanje yon abitid lokal an yon solisyon modèn, pou bay plis fòs ak enpak nan solidarite ayisyèn nan. Misyon nou Misyon Anvlòp se bati yon pon solid ant jenerasyon jèn yo, kominote lokal yo, ak dyaspora a pou : Soutni pwojè ki pote chanjman pozitif nan sosyete a (lekòl, legliz, espò, aktivite sosyal). Fasilite koleksyon fon avèk zouti senp, aksesib, epi entegre ak MonCash ak lòt mwayen peman dijital. Bay transparans ak konfyans nan chak kontribisyon gras ak rapò otomatik ak tablodbò vizib pou tout moun. Ankouraje yon jenerasyon k ap aji olye yo tann, paske chak moun ka lanse yon kanpay epi jwenn sipò kominote a. Fè diaspora a tounen yon aktè dirèk nan devlopman lokal yo, paske yo ka kontribye fasil menm si yo lwen. Poukisa Anvlòp diferan ? Nou pa sèlman yon platfòm : nou se yon mouvman solidarite dijital. Nou chita sou yon tradisyon ayisyen ki deja egziste, men nou mete teknoloji pou l gen plis transparans ak pi gwo enpak. Nou bay jèn yo yon espas inovasyon sosyal, kote chak lide ka tounen yon pwojè reyalize. Valè nou yo Konfyans : Chak goud konte, chak tranzaksyon verifye. Transparans : Done yo klè, rapò yo piblik. Solidarite : Nou kwè nan fòs “mete men ansanm”. Inovasyon : Nou pote yon zouti senp, modèn ak aksesib. Kontakte nou Imèl : enfo@anvlop.online WhatsApp / Telefòn : +5093811-8234
Rezo Sosyal : Facebook, Instagram, Twitter, Kwaaze → @anvlop